Ez isches verbi und ich sitze miz drin

innerlich stumm will mir chunt nüt in Sinn

lauf uf Autopilot und bin gröschtenteils tot

suech' en Punkt wo nöd weh tuet aber nüt isch im Lot

Und au wänn da de Tod nöd für immer regiert

so trännt er doch zytlich und das depremiert

Mir isch trümmlig vom Gheie und ich cha nüm da stah

Bin heiser vom Schreie und muesses lah gah

Und au wännd mr grad jetzt kein Gott bisch wo handlet

so bliibsch du doch de Gott wo Mänsch verwandlet

ich ha gnuet verhandlet und sueche min Stand

viellich' füehrsch mi ja use - ines neus Land

wo min Schmerz öppis bringt und wo ich's chan verstah

wo d'Hoffnig bestimmt und wo niemer muss gah

es Land a de Sunne voller Läbe - perfäkt

wo mr Loblieder singt, will mrs ständig erläbt

Und ich warte immerno

uf was ich ez nöd gseh

Mer seit du chasch verstah

Herr! Bisch du da?

Es seg nöd guet, häsch du gseit, dass dä Mänsch so ellei isch.

Aber was isch mit mir? Ich bin längschtens vom Tisch.

Bi bald 60i und suech sie scho mis ganze Läbe

Ja, ich wett nöd ellei sii, doch stah da im Näbel

und wird alt - alles um mich bliibt stah

S'isch nöd Zyt wo ablauft, nume ich schiin z'vergah

lueg nöd zrugg - lueg vorah - da isch trotzdem nüt z'ha

ha scho so vill erreicht, wo mer halt so chan ha

Geile Job, coole Charre, und wohne ganz nett

und all mini Sammlige hani komplett

und ez liegi im Bett und luege a 'Decki

xehn e Spinne im Netz und irgendwie checki:

Au ich sitz' im Netz - für das won ich wett

Mini Plän sind min Kerker und während ich red

packt mich Wuet, Luscht und Truur - scho lang uf de Luur

sött priorisiere, doch xehn nöd dedur

Das Paradox i mim Chopf das isch toxisch - ich hoff'

dass dä Zuestand vergaht - will solang er bestaht

jede Rat nöd zur Tat sondern nur zum Spagat wird

wo dänn ziemli grad stirbt

Ich stah vor zwei Tisch und beidi sind deckt

zwüsche Stüel näbe Bänk und es isch ganz verreckt

ich spiele uf Zyt bis mich öpper entdeckt

und für mich zu dir schreit, damit du's ändlich checksch

Und ich warte immerno

uf was ich ez nöd gseh

Es staht Du chöngsch verstah

Herr! Bisch Du da?

Ich sitz i de Klemme - es isch wie en Hohn

Es fühlt sich ächt ah als wär's Ändstation

Isch das ez de Lohn vo allne Entscheidige

wo ich gfällt han für Dich oder zum Dich verteidige?

Ich han immer nur Dich gwählt bis ich kei Wahl meh gha han.

Und ez weissi nöd, ob ich's nomal chan

Ich befürchte ich han das alles verlernt

wiä mr liidet und Angscht hät und dänn für dich schwärmt

Wiä mr s'Guete chan gseh und's im Herze bewahrt

während d'Finschternis zuenimmt und sich um eim schart

Du häsch mr sovill erspart und das isch mr no zwenig 

Doch Dis dienende Herz isch das vome König

Ja Du schuldisch mir nüt und ich Dir mis Läbe

und jedes Besträbe erschiint mr vergäbe

jede Plan gaht dernäbe und ich gspüre tüüf drin

han ebe doch mich gwählt mittels Logik und Sinn

Ja ich han nöd vertrout - ha mis eigne Riich bout

Ha nöd gsuecht nach dim Friede sondern nur Konflikt gmiede

Doch ez säg ich entschiede dass das so nöd chan gah

Ich fühl mich so trieb und stah wieder da woni

scho mal xi bin und hoffe uf Dich: 

Jesus, min König - Ich wett nur Dis Riich

boue und bitt' Dich: tue d'Auge mir uf

damit ich erkänne, wie sehr ich dich bruuch!

Und ich warte immerno

Und ich warte immerno

uf was ich ez nöd gseh

Ich weiss du chasch verstah

HERR

Ufe